Í upphafi ferðalagsins

 

Góðan daginn elsku fallegu Rósir :)

Nýtt ár er nú hafið og hugur okkar allra eflaust uppfullur af allskonar hugmyndum um það hvernig við getum farið að því að láta okkur líða betur á árinu 2012 heldur en á árinu 2011.

Það er ein grundvallarregla sem þarf að uppfylla áður en haldið er af stað:

„Það gerist ekki neitt hjá okkur ef jákvæða hugarfarið er ekki með í för"

Það er háklassa staðreynd að hreyfing og hollar matarvenjur eiga að vera hlutir sem við gerum af því að okkur langar til þess, okkur líður vel af því og okkur finnst það gaman. Þetta á ekki að snúast um að massa samviskubit sem við burðumst með vegna „ófullkomins" mataræðis, hreyfingarleysis eða almenns nennuleysis. Samviskubit er tilfinning sem algjör óþarfi er að burðast með, það gerir okkur enn leiðari og færir okkur enn lengra frá raunhæfum markmiðum. Sameinumst og fylgjum samviskubitinu til grafar.

„Dagurinn í dag er bestur, því í dag hefurðu allt sem þú þarfnast"

Það er nefnilega málið. Í dag höfum við það sem við þörfnumst. Við lifum besta lífinu með því að njóta þess sem við upplifum núna. Hvað getum við gert akkúrat núna til að okkur líði sem best? Við gerum það ekki með því að finna okkur sjálfum allt til foráttu, refsa okkur endalaust fyrir litlu smáatriðin sem ekki ganga upp, tala illa um okkur sjálfar í huganum eða ímynda okkur allt það versta sem getur gerst. Nei, við gerum það með því að hrósa okkur sjálfum fyrir allt sem við gerum vel, við gerum það með því að fyrirgefa sjálfum okkur misgjörðir og mistök og með því að sætta okkur við okkur eins og við erum.

„Það væri lítið varið í skóginn ef aðeins fuglarnir með fallegustu röddina myndu syngja"

Við erum allar yndislegar, skemmtilegar, góðar, kærleiksríkar, fallegar og frábærar. Einfaldlega af því að við erum við. Það er engin önnur manneskja eins og ég eða þú. Hver og ein okkar hefur sína sérstöðu. Auðvitað erum við misjafnar, en það er líka það sem gerir lífið stórfenglegt. Við höfum allar okkar sögu að segja og það er mismikið sem hefur á daga okkar drifið. Lífið er núið og lífið er stutt, en það er sannarlega gott. Lífið er fullt af ónýttum tækifærum sem við höfum til að gera góða hluti enn skemmtilegri og breyta neikvæðum hugsunum í jákvæðar hugsanir.

„Þegar einar dyr í lífinu lokast þá opnast aðrar"

Bættur lífsstíll er ekkert annað en hugarfarsbreyting. Um leið og við lokum fyrir neikvæðar tilfinningar, hugsanir og athafnir, þá opnum við  fyrir jákvæðar tilfinningar, jákvætt hugarfar og upplifanir. Eyðum ekki tímanum í að sakna einhvers sem við höfum ekki. Það segir sig sjálft að það, að sitja heima og berja sjálfa sig niður fyrir að vera ekki svona eða hinsegin í útliti, orðum eða gjörðum, gerir ekki annað en að drepa niður alla möguleika á góðri nýtingu á góðri orku og jákvæðni. Horfum á það sem við höfum. Lífið okkar er stútfullt af möguleikum sem við getum nýtt okkur. Hvað langar okkur að gera?

„Gærdagurinn er fortíðin - ekkert sem þú gerir í dag breytir því sem gerðist í gær"

Hvað ætli við höfum eytt mörgum dýrmætum stundum lífs okkar í  hugsanir um fortíðna og eftirsjá gagnvart öllu því sem við gerðum eða gerðum ekki. Hvað ætli við höfum oft borðað allt of stóra matarskammta eingöngu af því að við vorum að syrgja eitthvað sem við ráðum ekki einu sinni við? Í einskærri vanlíðan og vonleysi höfum við refsað okkur fyrir að hafa ekki framkvæmt svona eða hinsegin. Eyðum orkunni í eitthvað annað en stöðugan samanburð við eitthvað og einhverja. Þetta er allt spurning um hugarfar. Jákvætt hugarfar og horfa fram á veginn. Líta á okkur sem manneskjur og virða okkar persónurétt. Við erum yndislegar manneskjur og við eigum rétt á að líða vel. Við höfum rétt til að setja okkur mörk og segja já eða nei án þess að þurfa að útskýra hvers vegna. Við höfum rétt til að takast á við lífið eins og við viljum og þurfum. Við getum aldrei stjórnað því hvað aðrir segja og gera eða bregðast við aðstæðum. Við berum allar ábyrgð á okkar eigin líðan og okkur ber að hugsa fyrst og fremst um að uppfylla okkur sjálfar.

„Ekkert gerist bara með því að smella fingrum"

Breyting á lífsstíl tekur tíma og það er heldur ekki áreynslulaust ferðalag. Við eigum án nokkurs vafa eftir að fara tvö skref áfram og eitt afturábak á leiðinni. Við þurfum að læra að gefa okkur sjálfum leyfi til að vera ekki fullkomnar og að gera ekki allt á fullkominn hátt. Setjum upp nokkrar megin leiðbeiningar sem við munum fara eftir í breyttum lífsstíl. Borðum morgunmat, hádegismat, millimál og kvöldmat og setjum bara einu sinni á diskinn. Við ættum allar að hreyfa okkur á einhvern hátt að algjöru lágmarki 3x í viku. Það er sagt að það taki líkamann um 21 dag að venjast og aðlagast breytingum. Það er ekki síður hugurinn sem þarf þessa aðlögun.

Förum kátar og glaðar, fullar af jákvæðni og hugrekki af stað í breytta og bætta líðan.

 Tökum einn dag í einu - lifum í núinu.

Með virðingu og kærleika

Ykkar Berglind