Í dag er fallegur dagur

Elsku fallegu Rósir, fallegu dömur, sem saman mynda fallegan Rósavönd

 

Ég rita hér orð mánudagsins :) en langt er nú orðið síðan ég hef lagt inn orð fyrir hæstvirtan mánudag!

 

Í dag er fallegur dagur. Yndislega fallegur og frábær mánudagur hálfnaður. Svo óskaplega dásamlega unaðslegt veður í dag. (Allavega sýnist mér það svona úr stofuglugganum mínum, þar sem ég sit við borðstofuborðið og er að sperrast við að læra!) Er ekki kominn sumarhugur í ykkur? Útilegupælingar? Ji, ég hlakka til að fara í útilegu í sumar! Það er fátt eins notalegt og að vera í útilegu í „guðsgrænniómengaðriíslenskrináttúru" (man einhver hver sagði þessi orð í gæsalöppunum?)

 

Mig langar að heyra frá ykkur kæru Rósirnar mínar :) Hvernig gengur ykkur með heilsuátakið ykkar? Hafið þið farið í gönguferðir þá daga sem ekki er leikfimi? Taka stigann í staðinn fyrir lyftuna? Leggja aðeins í burtu frá útidyrum? Reyna að sneiða hjá sætindum? Auka grænmetið og ávextina?

 

Hvernig gengur með matardagbækurnar?

 

Leiðið þið hugann annað slagið að lykilorðunum okkar 4, þolinmæði, jákvæðni, brosi og meðvitund? Höfðuð þið heilsuátakið okkar í huganum um helgina?

 

Eruð þið ekki rosalega spenntar fyrir því að koma í leikfimina í kvöld?

 

Ég hlakka ofsalega mikið til að takast á við komandi viku. Það er margt spennandi framundan. Við eigum til dæmis eftir að hittast nokkrum sinnum í vikunni og það verður æðislegt. Það er svo frábært að vera með ykkur.

 

Já, og það er fundur á miðvikudaginn :)

 

Mig langar að minna ykkur á að regluleg hreyfing er ákaflega mikilvæg fyrir líf okkar og heilsu.

 

• 1. Hjartað dælir betur
• 2. Góða kólesterólið vex
• 3. Líkamlegur kraftur eykst
• 4. Líkaminn verður sterkari og liðugari
• 5. Kynorkan styrkist (júhú - cool)
• 6. Lífslíkur aukast
• 7. Líkaminn verður úthaldsbetri og frískari
• 8. Líkur á beinbrotum minnka
• 9. Andlega hliðin verður sterkari og stressálag minnkar
• 10. Andlegur aldur lækkar
• 11. Líkaminn brennir meiru og líkamsfita minnkar
• 12. Svefninn batnar

 

Það er mikið atriði að setja hreyfingu og hollt mataræði inn sem jafn sjálfsagðan hluta af daglegu lífi og að bursta tennurnar. Ekki fara af stað með látum og ætla þér allt of mikið. Settu þér raunhæf markmið og auktu lífsgæði þín með mátulegri hreyfingu auk hollara mataræðis. Gerðu hreyfingu og hollt mataræði að skemmtilegum útgangspunkti fyrir líf þitt á hverjum degi.

 

Aðal markmið okkar með líkamsrækt og reglulegri hreyfingu er að auka almenna vellíðan - bæði andlega og líkamlega. Hreyfingarleysi er besti vinur þunglyndis og depurðar!

 

Innst inni í okkur öllum er ákveðin mynd - sjálfsmynd. Þessi mynd er af okkur sjálfum - af þér og því hvernig þú sérð sjálfa þig. Sumir þekkja þessa mynd ekki nógu vel. Allt sem hefur verið sagt við þig og þú lent í um ævina, bæði jákvætt og neikvætt hefur áhrif á þessa mynd.

 

Hver einstaklingur hefur sín eigin persónueinkenni - jafnvel eineggja tvíburar. Þetta þýðir að fólk hagar sér mismunandi við sömu aðstæður. Hver einstaklingur á sér sínar eigin hugsanir, tilfinningar, vonir, drauma og hæfileika og hver einstaklingur á sér einnig sínar eigin óttatilfinningar, veikleika og vandamál. Þetta á ekki bara við um þig, heldur líka alla hina.

 

Hversu oft hefur þú horft á aðra og óskað þess að þú hefðir sömu hæfileika eða getu og hinir? Hversu oft hefur þér fundist einhver annar vera fullkominn en ekki þú? Mundu að enginn er fullkominn.

Hættu að bera þig saman við aðra - það er betra að þekkja sjálfan sig og vera sáttur við sjálfan sig.

 

Það hefur enginn lofað því að lífið verði auðvelt. Aftur á móti get é lofað því að við munum oft í lífinu rekast á hindranir og brekkur. Við þurfum að takast á við álag og erfiðleika sem á vegi okkar verða. Lifðu ekki í vandamálinu - hugsaðu í lausnum. Lífið er stúfullt af lausnum - finndu þær og lífið mun verða auðveldara.

 

En hvað geturðu gert til að styrkja sjálfsmynd þína?

 

• Vertu sátt við sjálfa þig og lífið - ekki bera þig saman við aðra. Appelsína og banani verða ALDREI eins, alveg sama hvað þau leggja sig fram við að reyna!
• Það er betra að takast á við erfiðleika á uppbyggjandi hátt. Ef þú lendir í rifrildum eða þrætum eða einhver segir eitthvað neikvætt um þig eða við þig, þá skaltu ekki trúa öllu sem er sagt. Gerðu annarra orð og skoðanir ekki að þínum eigin. Þessar skoðanir og þessi orð þurfa ekki að vera réttar þó svo að einhver annar hafi sagt þau!
• Þekktu styrkleika þína og veikleika; það geta ekki allir verið góðir í öllu. Hlúðu að styrkleikum þínum. Viðurkenndu veikleika þína og fáðu hjálp ef þú þarft. Það er engin skömm að því - það er styrkur!
• Gerðu raunhæfar kröfur til sjálfrar þín. Þó að bróðir þinn, systir eða vinkona hafi alltaf fengið 10 í öllu er ekki þar með sagt að þú þurfir þess líka. Þínir hæfileikar liggja án efa bara á öðrum sviðum. Njóttu þess!

 

Að lokum við ég segja við ykkur að bros er eitt það dýrmætasta sem við eigum. Það er með ólíkindum hvað bros getur gert mikið fyrir okkur. Bara það að hitta glaðlyndan vin getur breytt ömurlegum degi fyrir okkur í yndislega dásamlegan dag. Við getum ákveðið með brosi að gera heiminn ýmist að fangelsi eða höll. Bros getur breytt hugarfari okkar. Með brosi kemur jákvæðni. Það er ekki hægt að brosa og vera fúll :) Brosið getur létt þungar byrðar. Það verður allt einhvernveginn einfaldara og fallegra með brosi!

 

Bros er eins og sólskin - það dreifist út um allt andlit - svo fallegt. Ef þú færir bros og þá jafnframt sólskin inn í líf annarra, þá áttu ákaflega erfitt með að halda því frá þínu eigin lífi :)

 

Brostu framan í aðra, brostu framan í sjálfa þig - þú verður ekki fyrir vonbrigðum - þú færð heilan helling af brosum til baka :)

 

Ég hlakka til að sjá ykkur í leikfiminni kl. 18:00 - klukkan sex - í dag.

 

Knús á ykkur dásamlegu Rósir.

 

Gangi ykkur vel

 

Lúv,

Berglind

 

 

 

 

Mömmu Fit Pilates

Það er orðið fullt á Mömmu Fit Pilates námskeiðið sem hefst 19. maí n.k. í Baðhúsinu og þökkum við fyrir hreint frábærar viðtökur.

Þetta verður frábært námskeið með frábærum mömmum og yndislegum börnum.

Við reiknum með að fara af stað aftur í haust. Endilega fylgist VEL með :)

Lúv,

Berglind og Tanía

 

Mömmu Fit Pilates

Það eru að týnast inn skráningarnar á námskeiðið og aðeins nokkur pláss laus.

Ef þið hafið áhuga á að vera með, endilega skráið ykkur :) [e-mail]

Námskeiðið byrjar 19. maí kl. 10:30 og stendur til 24. júní :)

Frábær leið til að koma sér í gang eftir barnsburð :)

Lúv,

Berglind

Mömmu Fit Pilates

Þann 19. maí hefst í Baðhúsinu Brautarholti Fit-Pilates námskeið fyrir nýjar mömmur.

Námskeiðið er hugsað þannig að mömmurnar geti komið með börnin með sér og haft þau í salnum hjá sér á meðan þær eru að gera æfingar. Æfingarnar eru margar hverjar þannig gerðar að hægt er að vera með börnin í fanginu á meðan æfingarnar eru iðkaðar. Fit-Pilates tónlistin er ákaflega mjúk, falleg og þægileg.

Fit-Pilates þjálfar djúpvöðva líkamans, gefur langa og fallega vöðva, sléttan kvið, grönn læri, sterkt bak, betri líkamsstöðu og aukinn liðleika. Fit-Pilates samanstendur af skemmtilegum og styrkjandi æfingum sem móta flottar línur líkamans. Enginn hamagangur og læti en það er vel tekið á. Æfingar á boltum veita þægilegt vöðva og líffæranudd. Fit-Pilates er æfingakerfi sem þú heldur áfram að stunda heima hjá þér og heldur þér þannig í formi. Fit-Pilates er leikfimi fyrir þá sem vilja sjá línurnar verða flottari.

Mömmu Fit-Pilates námskeiðið byrjar Miðvikudaginn 19. maí kl. 10:30 í Baðhúsinu Brautarholti og lýkur 24. júní, 5 vikur, 15 Fit-Pilates tímar og allt að 6 mömmumorgnar.

Tímar verða á Mánudögum, Miðvikudögum og Fimmtudögum kl. 10:30 í Freyjusal á 1. hæð. Haldið verður utan um hópinn á jákvæðan og uppbyggilegan hátt með því að senda pistla og fróðleik, upplýsingar um mataræði og hreyfingu, uppskriftir og gullkorn, hvatningu og greinar og hvað eina sem upp í hugann kemur. Samskipti utan Pilates tíma og mömmumorgna munu fara fram í gegnum tölvupóstinn.

Mömmumorgnarnir verða auglýstir betur síðar. Á mömmumorgnum munu þátttakendur geta rætt saman um það sem upp hefur komið með börnin eða þær sjálfar, um tilfinningar, okkur sjálfar, um gleði, um uppgötvanir, um bleyjuskipti, um brjóstagjöf, um svefninn. Allt milli himins og jarðar. Gefa ráð, þiggja ráð. Oft upplifa nýbakaðar mæður sig einangraðar og finna fyrir depurð. Mörgum mæðrum finnst þetta óeðlilegt ástand og fara jafnvel enn lengra niður fyrir vikið. Ég hef mikinn áhuga á því að vera með uppbyggjandi tíma þar sem konurnar geta talað saman, stutt hverja aðra og deilt því sem þær eru að ganga í gegnum.

Námskeiðsgjald er kr. 15.000. Innifalið er aðgangur að búningsklefum, gufubaði og heitum potti.

Við erum tvær sem skiptum námskeiðinu á milli okkar. Annars vegar undirrituð og hinsvegar Tanía. Tanía hefur séð um nokkur Mömmu Fit Pilates námskeið, hún hefur verið með Meðgöngu Fit Pilates og hún er einnig búin með námskeiðið Fullfrísk.

Athugið að leita eftir „grænu ljósi“ hjá lækni eða ljósmóður áður en þið farið af stað að hreyfa ykkur, ef þið eruð tiltölulega nýbúnar að eiga.

Endilega bendið þeim á sem þið teljið að gætu nýtt sér námskeiðið :)

Frábært námskeið fyrir nýjar mömmur og krílin þeirra :)

Skráning hafin á [e-mail]

Lúv,

Berglind

Fallegu rósirnar mínar :)

Í dag er mánudagur, ný vika framundan með öllum sínum spennandi tækifærum, gleði, hamingju, hindrunum og öllu öðru sem lífið hefur upp á að bjóða.

 

Í dag ætlum við að byrja í Heilsuátaki Rósanna.

 

Leggst það ekki vel í ykkur?

 

Ég geng út frá því að við höfum okkar samskipti í gegnum tölvupóst en ekki í gegnum facebook :) Ég mun senda gögn í tölvupóstinum :)

 

Í kvöld fáið þið smá möppu með lesefni og leiðbeinandi matseðli fyrir eina viku. Matseðillinn miðast við 3 aðalmáltíðir dagsins: Morgunmat, hádegismat og kvöldmat. Við tökum svo inn 1 - 2 millibita eftir þörfum.

 

Við erum að fara að vinna í að passa okkar skammtastærðir, fá okkur einu sinni á diskinn, vinna á hugarfari okkar.

 

Mig langar til að biðja ykkur um að hugleiða lykilorðin okkar fjögur í dag. Lykilorðin okkar fyrir Heilsuátakið eru:

 

Þolinmæði, Jákvæðni, Bros og meðvitund.

 

Vera þolinmóðar - þetta gerist ekki á einum degi. Við munum eiga einhver skref afturábak, en það er allt í lagi því við vitum að við getum svo vel risið upp aftur og haldið áfram.

 

Vera jákvæðar - allt sem við gerum byggist upp á jákvæðu hugarfari. Það er með ólíkindum hvað líf okkar verður auðveldara við það eitt að snúa neikvæðu upp í jákvætt.

 

Vera brosandi - bros smitar. Ef við brosum til annarra þá er næstum því bókað að við fáum bros til baka. Ef við brosum framan í eigin spegilmynd um leið og við lítum í spegil að morgni, þá getum við haft áhrif á það hvernig dagurinn okkar verður.

 

Vera meðvitaðar - það að vera meðvitaðar um það sem við erum að takast á við getur skipt sköpum fyrir þann árangur sem við munum ná. Að hafa hugann við markmiðið skiptir miklu máli.

 

Hvað segið þið, komnar í gírinn?

 

Lúv,

Berglind